Vaap Bekir

Bekir Vaap (1915-1944)

Cenkçi şairlerimizden biri Bekir Vaap 1915 senesi Bagçasaray rayonındaki Büyük Qaralez köyünde doğdu. Orta mektepni bitirgen soñ, Aqmescit pedagogika institutına kirip oqudı. 1937 senesi institutnı muvafaqiyetnen bitirdi, askerlikke alındı. Finlândiya cenkinde iştirak etti. Ondan qaytıp, “Qızıl Qırım” gazetasına işke kirgen vaqıtta Ulu Vatan cenki başladı. O, qalemini süngüge deñiştirip, kene cebhege ketti. Üyken leytenant rutbesinde rota komandiri olgan Bekir Vaap çoq kereler yaralandı. 1944 senesi avgust 4’te olğan qattı uruşlarda helâk oldu. Litvanıñ Vilga-Vişskiy rayonındaki Gayturlevka köyünde defn etildi.

Bekir Vaap institutga student ekende, şiirler yazıp, matbuatta bastırş başladı. “Yaş leninciler”, “Sovyet edebiyatı” mecmualarında, bunuñ kibi de, gazetalarda şairniñ “Vatanım”, “Sevem seni”, “Ana”, “Ordudan selâm” kibi bir sıra bediy cihetten pişkin şiirleri derc olundılar.

1938 senesi Bekir Vaapnıñ dostları Ğafar Bülganaqlı ve Reşid Muradnen beraber tertip etilgen “Yaşlıq yırları” cıyıntıgına onuñ bir sıra şiirleri kirsetildi. Şu senesi Bekir Vaap Yazıcılar birligine aza qabul olundı.

Cenkten soñ Bekir Vaapnıñ şiirleri bir qaç ortaq cıyıntıqlarğa kirsetildiler. 1990 senesi Taşkentte, Ğafur Ğulam adına Edebiyat ve sanat neşriyatı tarafından şairniñ eñ yahşı şiirlerinden tertip etilgen “Yazılıp bitirilmegen şiirler” kitabı basıp çıqarıldı.