Rustem Ali (1936-2020)
Rustem Ali 1936 senesi dekabr 26-da Sudaq şehrinde dünyaga keldi. Edebiyatnı ta balalıqtan sevdi. Buña o vaqıtlarda rayon gazetasında çalışqan anasınıñ tesiri olmay qalmadı.
Rustem Ali sürgünlikte orta mektepni bitirgen soñ qurucılıkta çalıştı. 1958 senesi Samarqand alış-veriş tehnikumını, 1973 senesi Taşkent Devlet universitetiniñ jurnalistika fakültetini bitirdi. 1958—1974 seneleri Andijan vilâyet (Özbekistan) alış-veriş sistemasında çalıştı.
Edebiyatqa, jurnalistikaga avesligi onu “Lenin bayragı” gazetasına işke alıp keldi. 1974 senesinden 1989 senesine kadar mühbir, bölük müdiri olup çalıştı. Qırımga köçken soñ, başta sovhozda çeşit işlerde, şimdi ise Sudaq rayon gazetasınıñ “Suvdag sesi” adlı qırımtatarca neşirine muharrirlik yapa.
Rustem Aliniñ ilki ikâyeleri “Lenin bayrağı” gazetasında basıldılar. Ondan soñ onuñ eserleri ortaq cıyıntıqlarda, “Yıldız” mecmuasında derc olundılar. O “Tanış nagmeler” (1976) adlı hikâyeler, “Selbiler ebediy yaşaylar” (birinci kital — 1980, ekinci kitap — 1982, üçünci kitap — 1985) adlı povestleri ve “Burulışta” (1989) romanınıñ müellifidir.
Yazıcınıñ eserlerindeki bir sıra şiirlerge, bunıñ kibi de, “Milletim Qırım” şiirine bestekârlarımız muzıka yazdılar.
Rustem Ali “Şanlı emegi içün” medalinen taqdirlengendir.
